John 19

1Wote Pailot ndi, Jisas ni mek, puk komnga pilda ndi, rᵾi! nitim. 2El wu nimbᵾ ndi, kan goimbun rong mul mat, tᵾk mᵾkᵾp etᵾk, King mbᵾ nga wᵾna mondᵾrmᵾn, ei mel endᵾtᵾng. Wote, wal pᵾki kunt ruⱡ kat i ku etᵾk, tᵾk pakᵾndrᵾng. 3Wote, el wu nimbᵾ ndi, nᵾk mel, “Kᵾnᵾiya! Ya wu ei, Jura wamp mbᵾ nga Wu Nuim Mumuk ye!” nᵾtᵾng. I nᵾk kᵾn, ki raka ndi rorung.

4Ni kᵾn, Pailot aldpa pena mba, wamp mou morung nimbᵾ kundpa nimba mel, “Ya kᵾnᵾiya! Na ndi, wu ei nga uⱡ ⱡawa ti kandᵾp, ti natᵾnt. Ei nga akup, mep pena omp, enim tᵾp waka nduimp,” nitim. 5Ei kᵾn, Jisas ni, kan goimbun wᵾna mel ni pakᵾpa, muⱡ ruⱡ ni kᵾⱡ raⱡpa, pena oⱡnga, Pailot ndi, wamp morung nimbᵾ kundpa nimba mel, “Na nᵾnt wu ni, ya kᵾnᵾiya!” nitim. 6Wote, Pris kᵾⱡ nga wu kuimbal kᵾⱡ kᵾn, rᵾp wu nimbᵾ kᵾn, Jisas ni kandᵾk, ke nᵾk mel, “Nde peta ila nil ro! Nde peta ila nil ro!” nᵾtᵾng. Pailot ndi, punt ropa, nimba mel, “Na ndi, wu ei nga uⱡ ⱡawa ti kandᵾp, ti natᵾnt. Ei kᵾn, en enim ndi, mek puk, nde peta ila nil rok pindᵾi!” nitim. 7Ni kᵾn, Jura wamp nimbᵾ ndi, punt rok, nᵾk mel, “Tᵾn nga mi ik ti petᵾm ei ndi, nimba mel, wu ei, elim Got nga kangᵾm nᵾtᵾm uⱡ ei nga kuⱡangga!” nᵾtᵾng.

8Ik ei mel nᵾtᵾng ni, Pailot ndi, pilpa mundmong minal itim. 9Wote, Pailot manga ila int mba, Jisas ni, waldpa nimba mel, “Nim nant ila molkᵾn urᵾn?” nitim. Wote Jisas ndi, ik ti, punt rui nᵾrᵾrᵾm. 10Ni kᵾn, Pailot ndi, Jisas kundpa nimba mel, “Nim rok kundᵾi, nint ndam, rok kunding! Muna wak runt ndam, wak ruimp, ei nga ronduⱡ ei, na tep mor,” nitim. 11Jisas ndi, punt ropa, nimba mel, “Nim Got ndi, ronduⱡ ngui nganggᵾⱡnga ndam, na tᵾkᵾn mana ndui nandᵾⱡina. Ei nga, na tᵾpa, nim nga ki ila amᵾndᵾm wu ei nga nit ei, oⱡa mba petᵾm,” nitim. 12Pailot ndi, ik ni pilpa, nombuⱡa ti kandᵾp tᵾp, Jisas ni, wak rop mundimp nimba pitim. Ni kᵾn, Jura wamp nimbᵾ ndi, ke nᵾk, “Wu ei, tᵾkᵾn ekit ndun ndam, nim wu nuim mumuk Sisa nga wu mᵾn ti mon. Wu ti, elim wu nuim ei, nᵾm ndam, nuim mumuk Sisa ei, tᵾpa pei mundᵾmba,” nᵾtᵾng. 13Pailot ndi, ik ni pilpa, Jisas ni, mepa pena omba, elim ni, kot pᵾtmᵾn kona ila mana murum. Kona ei mbi tek ku pol nᵾtmin. Grik ik ila mbi tek, ‘Gapata,’ nᵾtmᵾn.

14Kona ni, ou rᵾnggilmᵾ elinga, Jura wamp nga Pasopa rᵾng nuing ui ei, utᵾma orunga mel pitim. Ni kᵾn, Pailot ndi, Jura wamp nimbᵾ, kundpa nimba mel, “Enim nga wu nuim mumuk ei ya kᵾnᵾiya!” nitim. 15Wote ke nᵾk, int nduk nᵾk mel, “Rok konda! Rok konda! Nde peta ila pendkᵾn nil ro!” nᵾtᵾng. Ni kᵾn, Pailot ndi, punt ropa, nimba mel, “Na ndi, enim nga wu nuim mumuk ei, nde peta ila reimp ninmin ei!” nitim. Wote, Pris kᵾⱡ nga wu kuimbal kᵾⱡ ndi, ik punt rok, nᵾk mel, “Tᵾn nga wu nuim mumuk tenda e, i Sisa,” nᵾtᵾng. 16Wote Pailot ndi, Jisas nde peta ila reing nimba, wu ni kᵾⱡ nga ki ila ngurum.

Jisas Ni, Nde Peta Ila Pendᵾk Rorung

17Ni kᵾn, el wu nimbᵾ ndi, Jisas tᵾk ambᵾⱡᵾngina, elim nga nde peta ni, koma ropa, kona peng ni, wak ropa, kona ti mbi tek, ‘Wamp peng ombil,’ nᵾtmᵾn kona ila mepa purum. Ipru ik ila kona ei, mbi tek, ‘Golgata,’ nᵾtmᵾn. 18Kona ila, Jisas ni, nde peta ila pendᵾk rorung. Ni kᵾn, wu raⱡ pendᵾk rorung. Wu ti tᵾk ki mbo orunga rok, ti tᵾk, ki rar orunga rorung. Jisas ni, rᵾk ting ila pendᵾk rorung. 19Wote Pailot ndi, nde peta ila mon ti, rᵾi nilinga rorung ei ndi, nimba mel, “Nasaret Wu Jisas, Jura Wamp Nga Wu Nuim Mumuk Ei,” nimba murum. 20Ni kᵾn, Jura wamp minal ndi, mon kᵾⱡ kᵾmp rorung. Ei nambuⱡ emel, Jisas rorung kona ei, kona peng ila nondpa, wote, mon kᵾⱡ Grik, Latin, Ipru ik ila rurum. 21Wote Pris kᵾⱡ nga wu kuimbal nimbᵾ ndi, Pailot kundᵾk nᵾk mel, “Jura wamp nga wu nuim mumuk nᵾkᵾn, rui nᵾri! Wote wu ei, el elim ndi, nimba mel, ‘Na Jura wamp mbᵾ nga wu nuim mumuk ei, nᵾtᵾm ei mel rui!’” nᵾtᵾng. 22Pailot ndi, punt ropa, nimba mel, “Na ndi, mon runt ei mel muⱡangga!” nitim.

23Wote, el wu nimbᵾ ndi, Jisas ni, nde peta ila rok pendᵾk, elim nga muⱡ rᵾrᵾm ni kᵾⱡ, potᵾk tᵾk kᵾmp tᵾk, tᵾmbᵾkak etᵾk tᵾtᵾng. Wal pᵾki ruⱡ ti, rumbᵾⱡi nambrᵾng ni, pendᵾk tᵾtᵾng ku. 24El wu nimbᵾ, en enim nᵾk mel, “Wal pᵾki ruⱡ ei, ambuⱡpᵾn undi nᵾndᵾmin! El mong poⱡpᵾn kᵾnamina, ambᵾⱡᵾm wu ti tangga!” nᵾtᵾng. Ni kᵾn, Buk Wingti ila ik ti petᵾm ei, omba kupa itim,

“Na nga mel mbᵾ, kᵾmp tᵾk, elpa elpa tᵾk, wal pᵾki ruⱡi kᵾⱡ el mong puⱡing,” nitim.
El wu nimbᵾ ndi, uⱡ ei kupa etᵾng. 25Jisas nga nde peta puⱡ ila nondpa, elim nga mam Mariya kᵾn, ᵾngᵾn kᵾn, Kliopas ambᵾm Mariya kᵾn, Makndelin Mariya kᵾn morung. 26Jisas ndi, elim nga mam kandpa, wote elim nga kitip kᵾni wu numan ngorum ni ᵾnggᵾtᵾm. Kandpa kᵾn, elim nga mam ni kundpa nimba mel, “Amp ye! Int wu ei, nim nga kangnᵾm,” nitim. 27Wote Jisas ndi, kitip kᵾni wu ni kundpa nimba mel, “Int amp ei, nim nga manᵾm,” nitim. Ui ni kᵾn, kitip kᵾni wu ni ndi, amp ni mepa, mang kona mba rᵾp itim.

Jisas Ni Kurum

28Ni kᵾn, Jisas elim nga uⱡ etmba nimbᵾ, etᵾp pora ndunt nimba pilpa kᵾn, Buk Wingti ila ik mbᵾ omba, kupa etangga, nimba mel, “Na nu waka enim,” nitim. 29Ming tila nu wain kombila iti ni, peka ropa murum ila, muⱡ pang pang iti ti, tᵾk nu wain ila mana nduk, wote ndila rok tᵾk, oⱡa nduk, keta min ila, kopung kandrung. 30Wote Jisas ndi, nu wain ni nomba, nimba mel, “Pora ninim!” nitim. Ni kᵾn, peng ni, mana puⱡnga, koⱡpa nuim kan ᵾkrᵾm.

Jisas Nga Wᵾnggᵾⱡᵾp Ila Kupanda Ndi Purum

31Jura wamp nimbᵾ ndi, Pailot kundᵾk nᵾk mel, “Nde petal ila rorung wu kᵾⱡ nga kᵾmp mbᵾ, rop puk rok, nde peta ila mana teing ni!” nᵾtᵾng. I etᵾng ei, kongun pᵾmp kᵾn, nambuⱡ emel, ui ei, Jura wamp mbᵾ nga mowi kor ou ei kᵾn, wu kᵾⱡ nga kᵾng kᵾⱡ, nde peta ila pi napᵾmba. Ei nga, mowi kor onum ei, Kor Wingti ei. 32Wote, el wu nimbᵾ ndi, kuimp tek puk, wu ti nga kᵾmp raⱡ rok, puk rok, wote wu ti nga rok puk rorung. Wu raⱡ, Jisas kᵾn pendᵾk rorung wu raⱡ. 33Wote ok, Jisas ni, kandrung mel, koⱡpa pora ndurum. Ni kᵾn, Jisas nga kᵾmp raⱡ, rok puk, rui narᵾrᵾng. 34Ni kᵾn, el wu ti ndi, elim nga kupanda ni, tᵾpa oⱡa ndupa, Jisas nga wᵾnggᵾⱡᵾp ila poⱡnga, tᵾngᵾnda mint mema kᵾn, nu kᵾn oi nitim. 35Uⱡ itim kᵾⱡ, wu ti kᵾndrᵾm. Ei nga, enim mondᵾk pileing nimba kᵾn, uⱡ pitim ei mel, mendpᵾⱡ kundpa ninim. 36Uⱡ ei, Buk Wingti ila petᵾm ik ei, omba kupa itim:

“Ei kᵾn, elim nga ombil ti, rok puk rui, nᵾring,” nitim.
37Wote, Buk Wingti ila ku, ik ti ndi, nimba mel,

“Wamp mbᵾ ndi, kupanda ndi, purung wu ei kᵾning,” nitim.

Jisas Ni, Tᵾk On Etᵾng

38Ni kᵾn, akil tepa, Arimatiya wu Josep ndi, Jisas nga on ei, timp nimba mba, Pailot waldpa pitim. Josep ei, Jisas nga kitip kᵾni wu ti ku ei, mo ropa ᵾndrᵾm. Nambuⱡ emel, Jura wu mbᵾ nga mundmong itim. Wote Pailot ndi, kapⱡa nilinga, Josep ndi, Jisas nga on ei, tᵾpa mepa purum. 39Wote, Nikondimas ni wu ti, Jisas kᵾn rumbᵾⱡ rui ik nᵾtᵾnggil wu ni, Josep kᵾn mba, etpa kopung mura rui mat ou ndupa, 45 kilo mel mepa purum. 40Wu ni raⱡ ndi, Jisas nga on ni kopung mura rui mbᵾ ndi, kopung kandkᵾⱡ, muⱡ kurᵾmᵾⱡa tila kum rorᵾnggil. Uⱡ ei, Jura wamp mbᵾ nga wamp on angᵾndᵾk, etmin ei mel etᵾnggil. 41Jisas rorung kona ila, nondpa kongun kona ti titim. Kona ila wamp ᵾngᵾndi nangᵾndᵾtmin kona ila, ku manga ti titim. 42Jura wamp nga mowi kor muⱡing ui ei, nondpa itim. Wote, ku manga ei nondpa titim. Ei nga, Jisas nga on ni kona ila tetᵾng.